Фасилитация мыкты болгон жок — деген ой келди башыңызга. Балким башкалар эң жакшы өттү деп кетишти. Же тескерисинче — сиз жакшы деп ойлосоңуз, бирөөлөр жаман өттү деп сындашы мүмкүн. Эч нерсе эмес. Жасалган ишти кайра-кайра карап үйрөнүү — эң жакшы жол. Жолугуу бүткөн соң сценарийди ачып, башынан анализдеп чыгыңыз. Кийинкисинде дагы да жакшы болот.

Азыр бир канча ситуацияны карап өтөлү.

❌«Даярдаган иш жараксыз болуп калды»

Программа, көнүгүүлөр, суроолор даяр. А бирок катышуучуларды көргөндө даярдаган нерсеңиздин баары аларга жарабайт экенин түшүндүңүз.  

Эмнеге мындай болду: 

Демек, аудиторияңыздын портретин изилдеген эмессиз.

Эми эмне кылыш керек: 

Ошондуктан, бир нече варианттарды даярдап алганыңыз оң.

❌«Группадагы адамдар сизди башкарууга аракет кылып жатат»

Катышуучулардан эки-экиден бөлүнгүлө же суроого жооп бергиле деп сурандыңыз. Алар айтканыңызды аткарышкан жок. Же  «мындай кылалы», «бул бизге бул жакпайт», «андан көрө минткен жакшы», «биз мындай кылчубуз» — дей башташты.  

Эмнеге мындай болду: 

Фасилитатор — бул жардамчы адам. Демек, сиз өзүңүздү жардамчы катары тааныштырбадыңыз, кишилер ким экениңизди, ролуңузду түшүнгөн жок. 

Эми эмне кылыш керек: 

Мындай учурда өзүңүздү колго алып, кичипейилдик менен ордуңузду түшүндүрүп, алар менен кызматташканга аракеттениңиз. Анан кийинки жолугушуунун башында эле ролуңузду жана кантип жардам бере аларыңызды айтыңыз.

❌«Убакыт жетпейт калды»

Катышуучулар узак талкуулашты. Берилген убакыт бүттү, бирок максатка жана жыйынтыкка жетпей калышты. Анткени үлгүрүшкөн жок. 

Эмнеге мындай болду: 

Демек, катуу кызыгып кетип, процессти көзөмөлдөбөй, күтүлгөн жыйынтыкты унутуп койгонсуз. 

Эми эмне кылыш керек: 

Анда жыйындын соңунда эмне үчүн бул талкуу маанилүү болчу — ошону ар бир катышуучу түшүнгөндөй айтып коюңуз. Аларда жолугушуу пайдасыз болгондой сезим калбасын. Ошондуктан, кийинки кадамдар жөнүндө айтып бериңиз.

❌«Өз-өзүнчө бөлүнүп алышты»

Айрым бири-бирин жакшы тааныгандар бөлүнүп отуруп алышты. Бери жактагыларды унутуп коюп, өздөрүнчө бир нерселерди талкуулап жатышат.

Эмнеге мындай болду: 

Демек, сиз катышуучуларды аралыштырып отургузбадыңыз. Башында кантип отурушкан болсо, ошол бойдон тим койдуңуз.

Эми эмне кылыш керек: 

Катышуучуларды аралаштырып отургузуңуз. Жакшы тааныштар бир катарга же жакын отуруп калбагандай болсун.

❌«Жымжырттык»

Фасилитация учурунда эч ким үн катпай, жымжырт болуп калышканы жакшы көрүнүш эмес. 

Эмнеге мындай болду: 

Балким элдин баары телефонун чукулап жатышат. Же сөз эмне жөнүндө болуп жатканын түшүнбөгөндүктөн талкууга катышпай отурушат. 

Эми эмне кылыш керек: 

Тыныгуу бериңиз. Анан көйгөйдү баарына дагы бир жолу жарыялаңыз. Көйгөйдү катышуучулар өздөрү чечсин.